Diwrnodau allan yn Ninas Abertawe

Cyfadeilad hamdden newydd ffantastig Abertawe

Mae'r cyfadeilad hamdden yn dod â byd hamdden hollol newydd i Abertawe. Mae wedi'i rannu'n dri pharth, Craidd, Ymyl a Brig ac mae'r atyniad ffantastig hwn yn ddiwrnod allan gwych ar gyfer oedolion a phlant fel ei gilydd!

Yr Ymyl yw parc dŵr dan do mwyaf Cymru, gyda rhwydwaith o byllau, reidiau a llithrennau gan gynnwys y Masterblaster, y reid sglefrio dŵr wefreiddiol, a'r Boardrider, profiad syrffio dan do - sy'n siŵr o beri i'r adrenalin bwmpio. I gael reid fwy ymlaciol, ewch ar yr afon araf, mwynhewch y tonnau yn y pwll neu ewch i sblasio yn y pwll a'r lagŵn rhyngweithiol (sydd hefyd yn addas ar gyfer plant bach).

Mae'r Craidd yn cynnwys Man Chwarae ryngweithiol pedwar llawr a fydd yn adlonni anturiaethwyr ifanc am oriau yn ogystal â wal ddringo 32 troedfedd i herio dringwyr o bob oedran. Gyda rhaglen sy'n llawn dop o weithgareddau a gynhelir bob dydd mae bob amser rywbeth ar gael ar gyfer pob oedran a gallu.

Mae iechyd a ffitrwydd yn cyrraedd lefel newydd yn Y Brig, sy'n gartref i'r gampfa ddiweddaraf sydd â golygfeydd trawiadol dros orwel y ddinas a'r Sba moethus lle gallwch faldodi eich hun gyda'r cynhyrchion a'r triniaethau harddwch diweddaraf.

Neu, beth am alw i mewn i gael cwpanaid gwych o goffi…ac os rydych chi'n chwilio am rywle gwahanol i rannu'r newyddion diweddaraf gyda ffrindiau neu wobrwyo'r teulu gyda phryd o fwyd cartref blasus, dewch i fwynhau'r danteithion yn un o'n bwytai - a gadewch i ni wneud eich diwrnod gwych yn well.

Amgueddfa Genedlaethol y Glannau

Sut bynnag yw'r tywydd, mae bob amser rywbeth i adlonni ymwelwyr i Amgueddfa Genedlaethol y Glannau Abertawe. Mae'r amgueddfa arobryn hefyd yn gartref i arddangosfeydd, digwyddiadau a gweithgareddau drwy gydol y flwyddyn.

Parc Cwmdonkin ac Uplands Dylan Thomas

Roedd y parc yn bwysig iawn i Dylan pan oedd yn tyfu i fyny yn Uplands. Wrth fynd i mewn i'r Parc, gallwch droi i'r chwith neu i'r dde; bydd y naill ffordd neu'r llall yn dod â chi i gysgodfa drionglog, a gafodd ei chodi fel cofeb i Dylan. Ewch ymlaen i fyny'r llwybr, cyn troi i'r chwith, ar rodfa eang. Ar y chwith mae'r ffynnon yfed dŵr haearn bwrw, yn anffodus heb gwpan yfed tun fel y disgrifiodd Dylan bellach. Ewch yn ôl i'r ffynnon, ac ewch i fyny'r bryn, heibio'r cwt a gadewch y parc drwy'r giât uchaf, trowch i'r dde a cherddwch ymlaen i'r troad cyntaf ar y dde, sef Cwmdonkin Drive. Rhif 5 oedd tŷ Dylan Thomas - cafodd y tŷ ei adnewyddu i'w gyflwr gwreiddiol pan gafodd ei brynu fel tŷ newydd ym 1914. Ers 27 Hydref 2008 (94fed pen-blwydd Dylan) mae'r tŷ ar gael i'w logi fel profiad gwyliau â thema - bydd papur newyddion o'r cyfnod yno i chi, ond dim ffôn, dim teledu a dim radio!

Ffatri Siocled

Mae teithiau tywys o'r ffatri yn cael eu cynnal gan Cocoa y clown, sy'n sicrhau bod pob ymweliad a wneir yn brofiad siocledaidd iawn. Caiff grwpiau eu tywys o gwmpas y ffatri a dangosir iddynt sut mae gwneud y gwahanol fathau o siocled, gyda digonedd o samplu ar y ffordd!

Bae Abertawe yn y 1940au

Darganfyddwch drosoch eich hun sut roedd bywyd ar gyfer sifiliaid ar y 'Ffrynt Cartref' yn ystod yr Ail Ryfel Byd. Profwch olygfeydd a synau cyrch awyr. Dysgwch sut roedd pobl yn byw yn ystod y cyfnod hwnnw a beth allech chi ei fwyta gyda dognau wythnos! Mae ffilmiau byr ac arddangosfeydd o ddeunyddiau o'r cyfnod yn helpu i ddod â chyfnod dros 60 o flynyddoedd yn ôl yn fyw, pan roedd rhaid i bawb gario mwgwd nwy a cherdyn adnabod. Allech chi oroesi ar ddognau wythnos nodweddiadol?

Pwll Cenedlaethol Cymru

Mae Pwll Cenedlaethol Cymru'n gyfleuster ardderchog sydd hefyd ar gael i aelodau'r cyhoedd o bob oedran a gallu.

Yn ogystal â nofio i'r teulu a nofio mewn lonydd, mae gan Bwll Cenedlaethol Cymru ystod lawn o ddosbarthiadau a gweithgareddau iechyd a ffitrwydd mewn awyrgylch ymlaciedig a chyfeillgar - mae'n fwy na phwll nofio yn unig!

Stadiwm Liberty

Stadiwm Liberty, Abertawe, yw'r lleoliad pennaf ar gyfer cynadleddau a digwyddiadau yn ne-orllewin Cymru. Mae'r stadiwm hefyd yn gartref i Glwb Pêl-droed Dinas Abertawe a thîm rygbi rhanbarthol y Gweilch.

Plantasia, Parc Tawe

Byd egsotig planhigion ac anifeiliaid Abertawe. Dewch i fforio yn ein hafan drofannol unigryw o blanhigion ac anifeiliaid bendigedig yng nghanol y ddinas. O bryfed, ymlusgiaid, pysgod a mwncïod i blanhigion banana, planhigion afal pîn, cacti pigog a bambŵ anferth - mae gan Plantasia y cyfan, ac mae'n berffaith ar gyfer diwrnod allan unigryw i'r teulu, sut bynnag yw'r tywydd!

Canolfan Dylan Thomas

Mae Canolfan Dylan Thomas yn y Rhan Forwrol ger amgueddfeydd Abertawe ac mae ganddi fwyty ardderchog. Mae ar agor o 10am tan 4.30pm, saith niwrnod yr wythnos ac yn dathlu Dylan Thomas, bardd mwyaf enwog Abertawe.

Mae gan y ganolfan arddangosfa barhaol am Dylan Thomas a'i fywyd, yn ogystal â chaffi clyd sy'n llawn llyfrau, posteri a phethau cofiadwy. Mae'r ganolfan hefyd yn gartref i lawer o ddigwyddiadau llenyddol drwy gydol y flwyddyn, gan gynnwys yr Ŵyl Dylan Thomas flynyddol yn ystod mis Hydref a mis Tachwedd.

Castell Abertawe

Yn fuan bydd ymwelwyr yn cael crwydro o gwmpas Castell Abertawe am y tro cyntaf ers degawdau. Diolch i gyllid werth £165,000 gan Lywodraeth y Cynulliad a Cadw, bydd gwaith yn dechrau'n fuan ar glirio malurion o lefel llawr gwaelod yr atyniad hanesyddol er mwyn galluogi mynediad i ymwelwyr.

Mae Castell Abertawe yn dyddio o ddechrau'r 12fed ganrif a chydnabyddir yr adfeilion sy'n goroesi a'r lleoedd gwyrdd gyda'i gilydd fel heneb gofrestredig.

Mae rhai o adfeilion yr adeilad yn cynnwys tŵr hanesyddol gyda golygfeydd dros ganol y ddinas a'r arfordir, ond cafodd peth o'r llawr gwaelod sy'n arwain ato ei guddio gan bridd dros gyfnod o amser. Bellach mae'r penseiri Feilden Clegg Bradley yn llunio cynllun datblygu ar ran Cyngor Abertawe a'r Cynulliad i archwilio agor yr atyniad i'r cyhoedd unwaith eto a gwneud y gorau o'r castell fel nodwedd dwristiaeth, fasnachol ac addysgol.

Amgueddfa Fysiau Abertawe

Wedi'i gweithredu gan Ymddiriedolaeth Diogelu Trafnidiaeth De Cymru, Mae Amgueddfa Fysiau Abertawe yn atgyweirio, yn diogelu ac yn arddangos, ar y safle ac mewn sioeau, fysiau cwmnïau trafnidiaeth gyhoeddus De a Gorllewin Cymru. Mae'r casgliad nodedig yn cynnwys bysiau o Drafnidiaeth De Cymru (SWT), ei gymdeithion a chwmnïau eraill, gan gynnwys United Welsh, Morris Bros., Rees & Williams, Swan Motor Co., Castell-nedd a Chaerdydd, Llynfi, Red & White, Western Welsh a London Transport. Mae'r amgueddfa hefyd yn cynnwys casgliad bach o gerbydau eraill megis injan dân y Green Goddess a'r Scammell Scarabs clasurol.

Mae'r amgueddfa wedi'i lleoli ym Mharc Busnes SA1 (safle ffatri'r AWCO gynt), Fabian Way, Port Tennant. Mae hi ar agor dydd Sul: 10am tan 5pm, Llun-Gwener: 9am tan 4pm.